“NBA Technologies International” Gürcüstanda “Tomorrow’s Payment Technologies” tədbirinə ev sahibliyi etdi

Azərbaycanın ödəniş texnologiyaları sahəsində aparıcı şirkəti “NBA Technologies International” MMC 18 oktyabr 2024-cü il tarixində Gürcüstanın paytaxtı Tbilisidə keçirilən “Tomorrow’s Payment Technologies” adlı nüfuzlu tədbirin təşkilatçısı olub.

Bu tədbir, Qafqaz regionunda sürətlə böyüyən rəqəmsal ödəniş bazarının inkişafı, yeni texnoloji trendlərin tətbiqi və maliyyə sektorunda təhlükəsizliyin gücləndirilməsi məqsədilə təşkil edilib. Tədbirə bank sektorunun rəhbərləri, maliyyə texnologiyaları mütəxəssisləri, pərakəndə satış şəbəkələrinin nümayəndələri, həmçinin beynəlxalq tərəfdaş şirkətlər qatılıb.

İştirakçılar, təkmilləşdirilmiş təhlükəsizlik xüsusiyyətləri, inkişaf etmiş POS-kassa imkanları və bank xidmətlərini sadələşdirən yeni nəsil POS terminalları və ATM modelləri ilə yaxından tanış oldular. Bu texnologiyalar xüsusilə pərakəndə satış şəbəkələri və yüksək tranzaksiya həcminə malik digər sənaye sahələri üçün nəzərdə tutulub.

Tədbir çərçivəsində vurğulandı ki, təqdim olunan həllər yalnız gündəlik əməliyyatların sürətini artırmaqla kifayətlənmir, həm də maliyyə əməliyyatlarında şəffaflıq və təhlükəsizliyin yeni standartlarını formalaşdırır.

Qeyd edək ki, “NBA Technologies International” MMC-nin Gürcüstanda fəaliyyət göstərən nümayəndəliyi – “NBA Technologies International Georgia” bu ölkədə qlobal PAX və GRG Banking məhsullarının rəsmi və vahid distribyutorudur. Bu əməkdaşlıq Gürcüstanda maliyyə texnologiyalarının inkişafına, bank və pərakəndə sektorunun rəqəmsallaşmasına mühüm töhfə verir.

Tədbir iştirakçıları həmçinin, regionda ödəniş texnologiyalarının gələcəyi, müştəri təcrübəsinin rəqəmsal həllərlə təkmilləşdirilməsi və təhlükəsiz ödəniş sistemlərinin inteqrasiyası kimi mühüm mövzular ətrafında fikir mübadiləsi apardılar.

2006-cı ildən bəri Azərbaycan bazarında fəaliyyət göstərən NBA Technologies International " MMC şirkətinin fəaliyyət coğrafiyasını Gürcüstan, Tacikistan, Türkmənistan, Özbəkistan, Qırğızıstan ölkələri təşkil edir. Şirkətin direktoru Anar Şıxəliyev məruzəçiləri mükafatlandırmış və şirkətin əsas fəaliyyət məqsədi və hədəflərini qeyd etmişdir :

“Məqsədimiz ödəniş mənzərəsini yenidən formalaşdırmaq və biznes və istehlakçıların maliyyə cəhətdən qarşılıqlı əlaqələrini artırmaqdır. Biz qlobal tələblərə cavab vermək üçün təhlükəsiz, etibarlı və innovativ həllər təqdim etməyə hazırıq. Bu tədbir ən son texnologiya nailiyyətlərini Gürcüstan və onun hüdudlarından kənarda bazarlara çatdırmağa olan bağlılığımızı əks etdirir”.

“Tomorrow’s Payment Technologies” tədbiri, iştirakçılara ödəniş texnologiyalarının gələcəyinə dair aydın baxış təqdim etməklə yanaşı, “NBA Technologies International” şirkətinin regional liderlik mövqeyini də bir daha təsdiqlədi.